Ugcine esethuka inhlamba osukele uKhuzani kuFacebook
Ugcine esesebenzisa inhlaba umlandeli obesole uKhuzani ngomona ngokuthi akhankasele ukuthi ingoma yakhe ingene kwi-Top 10 yoKhozi FM.
UKhuzani ufake ezinkundleni zokuxumana enxusa abalandeli bakhe ukuthi bavotele ingoma yakhe asanda kuyikhipha, Umjolo Lowo.
Lo mlandeli, ozibiza ngoPrince Thulani Zulu kuFacebook, ube esemgudla, ethi ukuba awukho umona koMaskandi ngabe kuvotelwa ekaMthandeni ethi eParis.
“Ukube abaculi abanawo umona, ikakhulu laba bakaMaskandi ngabe senza into eyodwa,” kubhala uZulu.
“Le esayenza engomeni kaMzukulu ethi Dali Wami, nakwekaNtencane ethi Wawuthembeni, nakwekaKhuzani ethi Ijele.
“Bengingazimisele nje sidalo ukubona umculi kaMaskandi ekhankasela Ingoma yakhe ngaphandle kwale ethi iParis.
“Abaculi abayeke umona bevume ukuthi kulo nyaka ayikho ingoma emnandi nehamba phambili ukwedlula iParis.”
Kube uzithintele ke kuKhuzani, wabuya wazifaka zaphelela ezimbanjeni, waze wagcina esebuyela enhlambeni umfokaZulu.
“Nanihlangene kwiJele?,” kubuza uKhuzani empendulweni yakhe qede elandelisa nge-emoji yokuhleka.
“Waze wangihlekisa. Akunina enanithi iJele isgekle, nathi ingoma eshisayo ilena ayadlalwa sekudlule u-12 eyahlulwa ngisho Imali Eningi?
“Ngoba nina… Manje nifuna bonke abaculi bahoxe, badedele nina? Niyokhangezwa omama benuamawini.
“Kulo mdlalo kuyohlezi kuyijubane njengoba nibhizi nibalisa engabe nithumela ama-sms (okuvota).
“Ngonyaka odlule wathini ngesikhathi umkhulu wakho emaka oSkweletu ethi akayona inkakha?
“Yena awushongo ukuthi unomona ngoba nakhu umuzwa ekhaleni,” kuqhuba uKhuzani.
OLUNYE UDABA: Ushiye imiyalelo yokuthi athunwe kanjani uGogo Mathambo
Ephendula uZulu uvele wabe eseqala ngenhlamba, wabe esephika ukuthi ubeqondise kuKhuzani.
