Ibingayinhle inyanga yabesifazane kwezikaqedisizungu

Ayibaphathanga kahle inyanga yabesifazane abathandi bezikaqedisizungu kuleli kulandela  ukudlula emhlabeni kwezingqungqulu  ezine esikhathini esingaphansi kwenyanga. Abesifazane abasendimeni kaqedisizungu abazange balithole ithuba lokubungaza ubuqhawe babo njengoba behlelwe ifu elimnyama.

Kuqale kwavela izindaba zomlingisi uConnie Chiume, obengumlingisi emidlalweni kamabonakude, kwalandela uZanele Mbokazi umsunguli wamaCrown Gospel Awards esikhathini esingamasonto amabili.

Kusenjalo ngoMgqibelo mhla zingama 31 kuNcwaba abomndeni wembongi yakuleli edume umhlaba wonke uJessica Mbangeni bakhiphe isitatimende sokudlula kwayo emhlabeni nokuthuse abaningi ngoba beyingakaze ibikwe ingaphilile, lezi zindaba zisabalale ngesikhathi esifanayo nezalowo owayengunkosikazi ka DJ Fresh, uThabiso Sekwane obaziwa kakhulu kwezokusakaza kanye nakumabonakude.